第一次離開魯吉一星期... @ 吉孖媽

話說吉媽突然要遠行去印度孟買, 可謂係一個避無可避既差事....

可能魯吉成歲貓仔都未見過行李箱, 當吉媽放個吉既行李箱喺廳未放野之前, 魯吉唔知做咩一支箭咁標去........... 哩埋!!!

仲以為佢實好想玩吓個箱, 諗咗陣...個傻吉梗係以為我又帶佢去睇醫生, 只係用個大D既箱裝佢....呵呵呵...傻豬....

放滿野之後......突然又發現個傻瓜...

魯吉: 咦~~哩舊咩來呢?? 唔係我用咁做咩呢...?

魯吉: 唔知媽媽會唔會裝埋我帶埋我去呢? 不過好似唔係幾夠位喎....

魯吉: 咁不如我一直扒喺度...媽媽唔覺唔覺以為我係舊野既一部份...可能真係會帶埋我一氣去喎...我仲有保護色添...嘿嘿嘿...

結果媽媽走咗, 帶唔倒魯吉...雖然只係一星期, 去到機場已經好掛住魯吉... 好彩有吉爸陪仔...但係我真係唔知以後點同吉爸一齊去旅行...唔通分開去咩....

想講吓孟買:

未去之前, 同事朋友都有以下忠告:

1) 沖涼D水最好唔好掂塊面;

2) 洗面用酒店比既樽裝水;

3) 唔好飲果D樽裝水, 自己帶好D, 如果冇就買入口既水, 當地咩水都唔好飲;

4) 唔好喺街邊食野, 果度唔係泰國;

5) 唔好比人見倒你有貴重野;

6) 唔好叫牛食, 神聖不可侵犯;

7) 用右手食野...

8) 一定要住5星酒店, 4星都唔得...

9) 必備蚊怕水...

10) 冇咩預防針可以打...等等

喺哩度第3日啦, 只飲自己帶黎既水, 刷牙洗面用樽裝水... 每日提供6支水比住客 (正常人地國家既酒店比2支都嫌多...即係D水可能真係有問題?) 唔好理啦...小心為上...

洗頭沖涼無可避免水會沾倒面...不過今日都未爛面應該尚算可以...

早餐係最好既因為酒店食自助餐, 只飲熱茶唔飲水....午餐喺公司飯堂食咖哩餐, 比想像中容易入口, 不過全部野加香草...同埋唔同既咖哩味...唔食得辣都幾難頂...晚餐喺酒店攪掂... 因為唔敢出街....

我個人從來冇打算哩印度旅行, 但揾食冇辦法啦...如果有朋友或貓友想哩旅行既話...Shopping免問, 只有一個購物商場叫Phoenix, 好似香港既Time Square咁, 不過細好多...咖哩國既同事叫我地去哩個好啦...其他會比人打劫而且冇人會幫你地既....今日膽粗粗叫人車我地去咗... 好過晚晚屈喺酒店好悶....

我眼見好多大型項目起緊過幾年先黎好D....不過D人真係好窮...好慘, 好多一家大細訓街邊仲要成條街都係露宿既人, 就算有屋既D窗玻璃都係又陳舊又破爛層樓好似危樓咁好多裂縫... 好慘情.... 貧者愈貧富者愈富...完全一目了然~~~ 貧富懸殊勁過香港好多......個政府唔知點做野架....

值得一提既係酒店保安好嚴密, 6-7人企喺門口, 袋同人都要分開過機好似過海關咁...令住客放心....亦即係治安真係好差....